رسالة شاعر

ألا يا شعر أنا لازم زمامك

وانا بركب بحورك لو تهوجي

ألمّع صورتك وارفع مقامك

ولا اجيب إلا منقي الهروجي

أنا ياشعر اشوف البعض ضامك

يجيب الفاظ ملتوية وعوجي

وانا يا شعر شعري لاحترامك

اجيبه جزل ترقى به سروجي

وشعري يالشعر فيه احتشامك

عن المحظور وافعال(ن)تموجي

أنا بابْدِع وانا باجيد نظمك

وادور للعطر بين المروجي

ألا ياشاعر اشعارك وسامك

وللاشعار مدخال وخروجي

ألا يا مفتخر فخرك بقومك

بعد فخرك بدين(ن) لك يروجي

ولا تهجي خوانك أو عمامك

وخل هجاك لاقوام العلوجي

وخلك في الغزل عذري كلامك

وللاخدار لاتغدي ولوجي

ولاتمدح لأن المال همك

وخلك بالصدق دايم لهوجي

وخل رثاك يحكي عن كلومك

والاحزان الي في قلبك تدوجي

على بعض الشعر ناس(ن) تلومك

وبعضه يرفعك باعلى البروجي

قصيد(ن) ينتشر يعلن عن اسمك

وشعر(ن) يندفن بين الدروجي

ألا يالله عبدك تحت حكمك

بدرب الحق يسر لي نهوجي